මීටර් 400 කඩුලු ඉසව්වෙන් කෞෂල්‍යා ශ්‍රී ලංකාවේ තෙවැනි තැනට
යුද හමුදා මලල ක්‍රීඩා ශූරතාවලියේ පළමු දිනය වන අද කෞෂල්‍යා මධුශානී පුද්ගලික හොඳම කාලය වාර්තා කරමින් මීටර් 400 කඩුලු පැන දිවීමේ කාන්තා රන් පදක්කම දිනා ගැනීමට සමත් වූවාය.
ආබාදයක් හේතුවෙන් පසුගිය වසරේ දී පුද්ගලික හොඳම කාලය අතරට පිවිසීමට අපොහොසත් වූ ඇය, අද දැක්වූ කාලය වන තත්පර 59.68 ක කාලය වාර්තා අතරට එක්වන්නේ, ශ්‍රී ලංකාව වෙනුවෙන් එම ඉසව්වේ වේගවත්ම කාලය පෙන්වූ තෙවැනි ක්‍රීඩිකාව ලෙසය.
ඇයට පෙර ඇමරිකාවේ වාසය කරන ක්‍රිස්ටින් සොනාලි මෙරිල් තත්පර 56.45 ක් 2013 වසරේ දී දැක්වූ අතර, රසිකා දුලක්ෂි 2015 වසරේ දී තත්පර 59.37 ක දක්ෂතාවක් දක්වා තිබේ.
ඇයගෙන් පසුව අඩුම කාලයක් වාර්තා කළ ක්‍රීඩිකාව ලෙස කෞෂල්‍යා වාර්තා අතරට එක්වේ.
මේ අතර, පසුගිය දා පැවැති ආරක්ෂක සේවා මලල ක්‍රීඩා ශූරතාවලියේ දී ශ්‍යාමා දුලානි ද තත්පර 60 සීමාව පසු කරමින් තත්පර 59.83 කින් තරගය අවසන් කර පුද්ගලික හොඳම කාලය වාර්තා කළාය.
අද පැවැති තරගයේ දි දුලානීට හිමි වූයේ දෙවැනි ස්ථානය වන අතර, කෞෂල්‍යා හා දුලානී දක්වන දක්ෂතාවන්ට අනුව ලබන වසරේ දී තව දුරටත් කාලය වර්ධනය කරගනු ඇතැයි විශ්වාසය තැබිය හැක
