ලෝක ශූර සල්වාට තරග තහනමක් – තහනම් උත්තේජක පරීක්ෂණ මග හැරීම
2019 ලෝක ශූරතාවලියේ මීටර් 400 ඉසව්වෙන් රන් පදක්කම දිනාගත් බහරේනය නියෝජනය කරන සල්වා ඊද් නසර් ට තාවකාලික තහනමක් පැණවීමට ලෝක මලල ක්‍රීඩා සංගමයේ තහනම් උත්තේජක නිවාරණ ඒජන්සිය කටයුතු කර තිබේ.
එම ආයතනය නිවේදනය කරන්නේ, තරග නොපැවැත්වෙන කාලයේ දී තහනම් උත්තේජක පරීක්ෂණ මග හැරීම යන චෝදනාව යටතේ මෙම තහනම පණවා ඇති බවයි.
කෙසේ වෙතත් ඇයට ලබා දෙන දඬුවම සම්බන්ධයෙන් තොරතුරු මේ දක්වා නිකුත් කර නොමැත.
ඇය සම්බන්ධයෙන් ඉදිරියේ දී සිදු කරන කරුණු විමසීමකින් පසුව තහනම දීර්ඝ වනවාද නැද්ද යන්න සම්බන්ධයෙන් නිවේදනය කරණු ඇත.
නයිජීරියාවේ උපත ලබා බහරේනය නියෝජනය කරන සල්වා ආසියානු ක්‍රීඩා උළෙල වාර්තාවද සමගින් මීටර් 400 රන් පදක්කම දිනා ගත් අතර, මීටර් 100 සහාය කාන්තා ඉසව්වේ රන් පදක්කමද දිනා ගත්තාය.
ඇය පසුගිය වසරේ ලෝක ශූරතා රන් පදක්කම දිනා ගැනීමට වැයකල තත්පර 48.14 ක කාලය මෙතෙක් ඉතිහාසයේ ක්‍රීඩිකාවක් එම ඉසව්වෙන් වාර්තා කල තුන්වැනි හොඳම කාලය ලෙසද සැලකෙයි.
