ආසියානු ශූරතාවේ මීටර් 400 කාන්තා සහාය ඉසව්වට වැඩි පදක්කම් අවස්ථාවක් ?
ආසියානු ශූරතා මලල ක්‍රීඩා තරගාවලියට සහභාගීවන, ශ්‍රී ලංකා මලල ක්‍රීඩා කණ්ඩායමට මෙවර ක්‍රීඩක ක්‍රීඩිකාවන් 25 දෙනෙකු පමණ ඇතුළත් වන බව වාර්තා වේ.
ඊට පිරිමි, මීටර් 100 හා 400 සහාය දිවීමේ කණ්ඩායම් ද ඇතුළත්.
නමුත් එහිදී ශ්‍රී ලංකා කණ්ඩායම් සඳහා පදක්කම් හිමිකරගැනීමේ අවස්ථාව අල්ප වනු ඇති බව විචාරක මතයයි, කෙසේ වෙතත් මෙම තරගාවලියේ මීටර් 400 සහාය දිවීමේ කාන්තා ඉසව්වට ප්‍රභල කණ්ඩායම් සහභාගී නොවීමේ හැකියාව මත, ශ්‍රී ලංකාවට පදක්කමක් හිමිකරගැනීමේ අවස්ථාව තිබේ.
ජාතික තේරීම් තරගාවලියේදී, නිර්මාලී මධුෂිකා (තත් 54.16) හා දෙවැන්නා වූ උපමාලිකා රත්නකුමාරි (තත් 54.53) යන ක්‍රීඩිකාවන්ගේ දක්ෂතාව හා, මීටර් 800 ඉසව්වේ උපරිම දක්ෂතා දක්වමින් සිටින නිමාලී ලියනාරච්චි හා ගයන්තිකා අබේරත්න යන ක්‍රීඩිකාවන් දෙදෙනා සහාය දිවීමේ ඉසව්වට යොදා ගැනීමට හැකිනම් පදක්කමක් දිනා ගැනීමේ අවස්ථාවක් තිබේ.
ඉන්දියාවේ පැවැත්වෙන ආසියානු ශූරතා මලල ක්‍රීඩා තරගාවලියට ප්‍රධාන පෙළේ කණ්ඩායම් ඉදිරිපත් නොවීමේ අවධානමක් පැවතීම හේතුවෙන්, මෙම අවස්ථාව සම්බන්ධයෙන් තේරීම් කමිටුවේ අවධානය යොමුවිය යුතුය.
ජ්‍යේෂ්ඨ දත්ත සටහන්කරුවෙකු පෙන්වා දෙන්නේ, ශ්‍රී ලංකා කණ්ඩායමට ඉහත දක්ෂතා අනුව මිනිත්තු 3යි තත්පර 40 කට ආසන්න කාලයක් වාර්තා කිරීමේ අවස්ථාව ඇති බවය.
මේ වනවිට, ඉහත කාලය තුළ දක්ෂතා දක්වමින් පසුවන්නේ, ඉන්දියාව, චීනය, බහරේන් හා ජපාන කණ්ඩායම් වුවත්, මේ අතරින් ජපානය හා චීනය සහභාගී වීම අවිනිශ්චිත තත්වයක පැවතීම මත ශ්‍රී ලංකාවට පදක්කමක් හිමිකරගැනීමට අවස්ථාවක් තිබිය හැක.
ආසියානු ශූරතා මලල ක්‍රීඩා තරගාවලිය ලබන මස 6 වැනි දා සිට 9 වැනි දා දක්වා ඉන්දියාවේ ඔඩිෂා හීදී පැවැත්වේ.
